मुंबई । माजी मुख्यमंत्री व विधानसभा विरोधी पक्षनेते देवेंद्र फडणवीस ( Devendra Fadnavis) यांना आरोपी म्हणून नोटीस पाठवली नाहीतर माहिती घेण्यासाठी त्यांची चौकशी केली गेली,असे स्पष्टीकरण गृहमंत्री दिलीप वळसे पाटील यांनी दिले आहे.
मुंबई सायबर सेल पोलिसांनी काल माजी मुख्यमंत्री व विधानसभा विरोधी पक्षनेते देवेंद्र फडणवीस यांची त्यांच्या सागर या निवासस्थानी दोन तास कसून चौकशी केली.मात्र या चौकशीला भाजपकडून विरोध करण्यात येत होता व हा मुद्दा विधानसभेमध्ये गाजणार यामध्ये कुठलेही दुमत नव्हते ;पण या मुद्द्यावर आज विधानसभेमध्ये भाजप नेते आक्रमक झाले असताना यास उत्तर देताना गृहमंत्री वळसे पाटील ( Home Minister Walse Patil)यांनी हे स्पष्टीकरण देऊन वादावर पडदा टाकला आहे.
गृहमंत्री वळसे पाटील म्हणाले, (Home Minister About Fadnavis Interrogation) की या प्रकरणांमध्ये अज्ञात व्यक्तीविरोधात गुन्हा दाखल झाला आहे. २४ लोकांचे जबाब घेतले गेले आहेत. सीआरपीसी ॲक्ट 160 प्रमाणे तपास अधिकाऱ्यांना कुठली माहिती हवी असल्यास ते मागू शकतात. देवेंद्र फडवणीस यांना या अगोदरही नोटिसा पाठवण्यात आल्या होत्या. पण ते कामांमध्ये कदाचित व्यस्त असल्याकारणाने त्याला उत्तर देऊ शकले नाहीत. याबाबत त्यांना कुठले प्रश्न विचारण्यात आले व त्यांनी काय उत्तर दिली हे मला माहीत नाही. परंतु चौकशी याबाबत सुरु आहे की गुप्तचर विभागाचा डेटा बाहेर कसा आला. केंद्रीय गृह सचिव यांना पत्र पाठवून तो पेन ड्राईव्ह पोलिसांनी मागवला आहे. आपल्याकडे काय माहिती आहे, हेच त्यांना विचारण्यात आले होते. हा रुटीनचा भाग असून देवेंद्र फडवणीस हे आरोपी म्हणून त्यांना नोटीस पाठवली नाही. जाणीपूर्वक त्यांना अडचणीत आणण्याचा शासनाचा कुठलाही मानस नाही आहे. त्या कारणास्तव हा विषय इथेच थांबवावा अशी विनंतीही त्यांनी सभागृहातील भाजप नेत्यांना केली.
मला काही चिंता नाही…
गृहमंत्री दिलीप वळसे पाटील यांनी दिलेल्या उत्तरानंतर यावर बोलताना देवेंद्र फडणवीस म्हणाले की, या प्रश्नावर मी पोलिसांना सांगितले होते की मी उत्तर देणार आहे. परंतु, या अगोदर मला पाठवण्यात आलेल्या प्रश्नावलीतले प्रश्न व कालचे प्रश्न यात गुणात्मक फरक आहे. तुम्ही ऑफिशियल सिक्रेट ॲक्टचा भंग केला आहे का? असे वाटत नाही का? अशा पद्धतीचा प्रश्न म्हणजे मला साक्षीदार म्हणून विचारण्यात आलेला प्रश्न नसून मला यामध्ये गोवण्याचा प्रयत्न करत असल्याचे त्यांनी सांगितले. परंतु विजल ब्लोअर ॲक्ट प्रमाणे मी पूर्ण सुरक्षित असून मला काही चिंता नाही.
