पुणे। “मुख्यमंत्री एकनाथ यांच्यासह (Chief Minister Eknath Shinde) आमदार गुवाहाटीला कामाख्या देवीच्या दर्शनाला जात आहेत. त्यांना शुभेच्छा. कामाख्या देवीला रेड्याचा बळी दिला जातो. शिंदे गट आता कोणाचा बळी द्यायला गुवाहाटीला चालले आहेत, हे माहीत नाही,” असा टोला विरोधी पक्षनेते अजित पवार (Ajit Pawar) यांनी मुख्यमंत्र्यांना लगावला.शिवाय महाराष्ट्र बंदबाबतच्या (Maharashtra bandh) उद्धव ठाकरे (Udbhav Thackeray)यांच्या आवाहनाला सकारात्मक प्रतिसाद राहील असेही त्यांनी स्पष्ट केले.
कालवा सल्लागार समितीच्या बैठकीनंतर ते पत्रकारांशी बोलत होते. राज्यातील सत्तांतरांचे नाट्य गुवाहाटीत घडले होते. त्याठिकाणी मुख्यमंत्री शिंदे आमदारांसह कामाख्या देवीच्या दर्शनाला जाणार असल्याचे निश्चित झाले आहे. या मुद्यावर पवार म्हणाले, देवदर्शनाला जात असतील तर शुभेच्छा आहेत. काही ठिकाणी कोंबड्याचा, बकऱ्यांचा बळी देतात. परंतु कामाख्या देवीला रेड्याचा बळी देतात, ते कोणाचा बळी द्यायला जात आहेत, माहीत नाही. असेही ते म्हणाले.
