पुणे|
आगामी जिल्हा परिषद, महानगरपालिकांच्या निवडणुकांमध्ये नव्या चेहर्‍यांना संधी दिली जाईल, अशी ग्वाही राज्याचे उपमुख्यमंत्री अजित पवार यांनी येथे दिली.
मांजरी बुद्रुक येथे राष्ट्रवादी प्रदेश युवक काँग्रेसचे सरचिटणीस अजित दत्तात्रय घुले यांच्या जनसंपर्क कार्यालयाचे उद्घाटन उपमुख्यमंत्री अजित पवार व प्रदेशाध्यक्ष जयंत पाटील यांच्या हस्ते करण्यात आले.त्याप्रसंगी ते बोलत होते.
यावेळी अजित पवार म्हणाले, आम्ही खासदार, आमदार आणि मंत्री झालो मग खाली काम करणाऱ्या कार्यकर्त्यांनादेखील संधी मिळाली पाहिजे. ते आमचे कर्तव्य आहे. त्यामुळेच आगामी जिल्हा परिषद तसेच महानगरपालिकांसह अन्य निवडणुकांमध्ये नव्या चेहऱ्यांना संधी दिली जाईल तसेच जुन्यांचा समन्वय साधण्याचाही प्रयत्न केला जाईल. मागच्या निवडणुकांमध्ये तुम्ही तुमच्या भागातून खासदार देखील निवडून देण्याचे काम केले आहे. तसेच जिल्ह्यातून दहा आमदार राष्ट्रवादी काँग्रेसचे आणि दोन आमदार काँग्रेसचे निवडून दिले. त्यामुळे तुम्ही उत्साहात काम करा. पक्षाला कुठेही कमीपणा येणार नाही असं काम करू नका. आम्हीनव्या चेहर्‍यांना संधी देणार आणि ते आमचे कर्तव्य आहे.
